၂၀၂၄ ခုနှစ်၊ ဇန်န၀ါရီလ (၁၀-၁၁)ရက်များတွင် Zoom Application ဖြင့် နေ့စဥ် နံနက် (၉း၀၀)နာရီမှ ညနေ (၄း၀၀) နာရီအထိ ကျင်းပခဲ့ရာ၊ သဘာပတိအဖြစ် နှစ်ခြင်းအသင်းချုပ် ဥက္ကဌများက အလှည့်ကျ ဦးဆောင်ခဲ့ကြပါ သည်။ လူမျိုးစုနှင့် ဒေသန္တရအဖွဲ့ချုပ်(၁၈)ဖွဲ့နှင့် တိုက်ရိုက် ဆက်သွယ်သော အသင်းတော်နှစ်ပါးမှ ကိုယ်စားလှယ်တော်များ စုံညီစွာ တက်ရောက် ပါဝင်ခဲ့ကြပါသည်။

အစည်းအဝေးကို ဒုတိယဥက္ကဌ Rev. စောစမ်စန် ဆက်ကပ် ဆုတောင်းခြင်းဖြင့် စတင်ဖွင့်လှစ်ခဲ့ပြီး၊  နံနက် ၀တ်ပြုခြင်း အစီအစဥ်တွင် သဘာပတိ လူငယ်ဌာန တာ၀န်ခံ ဆရာဝင်းထွဋ်သာကြည်၊ ဒေသနာကို ဧသဌာန သဘာပတိ Rev. ကျင်ရှင်းပေါင်၊ အထူးဆုတောင်းခြင်းနှင့် ကောင်းချီးပေးခြင်းကို ဓမ္မအမှုတော်ဆောင်များ ဌာန တာဝန်ခံ Rev. Dr.စောအယ်သောတို့က ဦးဆောင်ခဲ့ကြပါသည်။

မှတ်တမ်းရေးမှူးများအဖြစ် CSSDD တာဝန်ခံ Rev. Dr. မန်ခန့်ဆုမ်းနှင့် ဧသဌာနတာ၀န်ခံ Rev. ရိုဆန်း တို့ကို ရွေးချယ်ခဲ့ကြပါသည်။ အစည်းအဝေး ပထမနေ့ အစီအစဥ်ကို သဘာပတိအဖြစ် နှစ်ခြင်းအသင်း ချုပ် ဥက္ကဌ Rev. Dr.စောဆမ်ဆန်က ဦးဆောင်လျက် ဆုတောင်းခြင်းဖြင့် စတင်ခဲ့ပြီး၊ အမှာစကား ပြောကြား ရာတွင်  မြန်မာနိုင်ငံ နှစ်ခြင်း ခရစ်ယာန်အသင်းချုပ် အုပ်ချုပ်စီမံရေး အဖွဲ့အစည်းအဝေး (၂၀၂၃)ခုနှစ် သို့ တက် ရောက် ပါဝင်လာသော လူမျိုးစုနှင့် ဒေသန္တရအဖွဲ့ချုပ် (၁၈)ဖွဲ့နှင့် တိုက်ရိုက်ဆက်သော အသင်းတော်(၂)ပါးမှ ကိုယ်စားလှယ်တော်ကြီးများ၊ အသင်းချုပ် အရာရှိများ၊ ဌာနတာ၀န်ခံများနှင့် သဘာပတိများ၊ လုပ်ဖော်ဆောင် ဖက်များအားလုံးကို ဘုရားသခင် ထံတော်ပါးမှ ကောင်းချီးမင်္ဂလာများ ခံစားရရှိပါစေဟု ဆုတောင်းပေးလျက် ဝမ်းမြောက်ဝမ်းသာစွာ နှုတ်ခွန်း ဆက်ပါ ကြောင်း၊

ယနေ့ထိတိုင်အောင် နှစ်ခြင်း သာသနာကိုလမ်းပြပို့ဆောင်သော ဘုရားသခင်၏ ကျေးဇူးတော်ကို ချီးမွမ်း ပါကြောင်း၊ နှစ်ခြင်းအသင်းချုပ်၏  ၂၀၂၃ ခုနှစ် သာသနာလုပ်ငန်းများ၏ အရေးကြီးသည့်ကဏ္ဍများကို တာဝန်ယူ ဆောင်ရွက်ခဲ့ကြသော ဥက္ကဌ အဖွဲ့၀င်များ၊ အလုပ် အမှုဆောင် အဖွဲ့၀င်များ၊ လူမျိုးစုနှင့် ဒေသန္တရ အဖွဲ့ချုပ်များ၏ အထွေထွေ အတွင်းရေးမှူးများ၊ ကိုယ်စားလှယ် ခေါင်း‌ဆောင်များ၊ အသင်းချုပ် အရာရှိများ၊ ဌာနသဘာပတိများနှင့် တာ၀န်ခံများအားလုံးကို အထူးကျေးဇူးတင်ရှိပါကြောင်း၊

၂၀၂၃ ခုနှစ်၏ အနေအထားကို ပြန်ကြည့်မည်ဆိုလျှင်  နိုင်ငံတကာ၌ သေကြေမှုများ၊ ပျက်စီးမှုများ၊ ဆုံးရှုံးမှုများ၊ ကြောက်ရွံ့မှုများ၊ စိုးရိမ်မှုများ၊ ပဋိပက္ခများကို ကြားနေရ၊ မြင်နေရပါကြောင်း၊ ထိုအရာများသည် စိတ်မချမ်းသာစရာ ဖြစ်ကြောင်း၊ ထို့ကြောင့် ယုံကြည်သူများ၊ အသင်းတော်များမှာ ပင်ပန်းပြီး စိတ်မချမ်းမြေ့စရာ ဝန်များနှင့် စိတ်ဖိစီးနေကြကြောင်း၊

သည်လိုအချိန်တွင် သခင်ယေရှုခရစ်တော်၏  နှုတ်ကပတ်တော် သမ္မာတရားဖြစ်သည့် ”ဝန်လေး၍ ပင်ပန်း သောသူ အပေါင်းတို့ ငါ့ထံသို့ လာကြလော့။ ငါသည် ချမ်းသာပေးမည်”ဆိုသည့် အတိုင်း၊ ဤကျမ်းချက်သည် ကျွန်တော်တို့ကို ခွန်အားဖြစ်စေသကဲ့သို့၊ အမှုတော်လုပ်ငန်းမှာလည်း ဝမ်း‌မြောက်ဝမ်းသာစွာ ကျေးဇူးတော်ချီးမွမ်းရင်း  ဆက်လက်လုပ်ဆောင်နိုင်ဖို့ ခွန်အားဖြစ်ပြီး၊ ဆက်လက် အမှုတော်ထမ်းဆောင်နိုင်တဲ့အတွက်လည်း ဘုရားသခင်၏ ဂုဏ်တော်ကို ချီးမွမ်းပါကြောင်း၊

အမှုတော်လုပ်ငန်း လုပ်ဆောင်ကြသည့်အခါ နှစ်ခြင်းအသင်းချုပ်နဲ့ အတူတကွ  ပါဝင်ကြသည့် အဖွဲ့ အစည်း များသော်လည်းကောင်း၊  တစ်ဦးချင်းသော်လည်းကောင်း၊ အချိန်ပေးပြီး ဆက်ကပ်ကြသော အမှုတော်ဆောင်များ၊ ယုံကြည်သူများ၊ ဆုတောင်းပေးသူများ အားလုံး ရှေ့ဆက်ပြီး သာသနာအတွက် လုပ်ဆောင်ကြရမှာ ဖြစ်ပါကြောင်း၊

အသင်းချုပ်၏ ၂၀၂၄ ခုနှစ်အတွက် အဓိကအချက်မှာ “တည်ကြည် ခိုင်ခံ့သော အသင်းတော်”ဖြစ်ပါ၍ မုန်တိုင်းနှင့် လေလှိုင်းများ ပြင်းထန်နေသော်လည်း၊ ယုံကြည်ခြင်း ခိုင်မာစွာဖြင့် အမှုတော်လုပ်ငန်း လုပ်ဆောင် ကြသည့် အခါ ရှေ့ဆက်ပြီး တစ်ဦးစီတိုင်းဟာ သာသနာတော် အမှုတော်လုပ်ငန်းမှာ၊ မိမိရှိတဲ့နေရာ၊ ကဏ္ဍအသီးသီး မှာ အမှုတော်မြတ်အတွက် ပါဝင်ကြပါစို့ဟု ဆန္ဒပြုရင်း နိဂုံးချုပ်ပါကြောင်း ပြောကြားသွားပါသည်။

အစည်းအဝေးကို ဆက်လက်ပြုလုပ်ရာ ဦးစွာ ယခင်အစည်းအဝေး မှတ်တမ်း (၂၀၂၂ခုနှစ်)ကို အတည်ပြု လက်ခံကြပါသည်။  ဆက်လက်၍ နှစ်ခြင်းအသင်းချုပ် အထွေထွေအတွင်းရေးမှူး Rev. Dr. ထန်ကျင့်လျန်းမှ အထွေထွေအတွင်းရေးမှူး၏ အစီရင်ခံစာနှင့် စုစည်းအစီရင်ခံစာကို တင်ပြခဲ့ပါသည်။ နှစ်ခြင်းအသင်းချုပ် ဘဏ္ဍာထိန်း ဆရာမ နန်းသူဇာမွန်မှလည်း ဘဏ္ဍာနှင့်ပစ္စည်းအစီရင်ခံစာကို တင်ပြခဲ့ပါသည်။ လူမျိုးစုနှင့်ဒေသန္တရ အဖွဲ့ချုပ်များ နှင့် တိုက်ရိုက်ဆက်သွယ်သော အသင်းတော် (၂)ပါး မှလည်း အစီရင်ခံစာများကို ဖတ်ကြားတင်ပြခဲ့ပါသည်။

ဒုတိယနေ့ အစီအစဥ်တွင် နံနက်ဝတ်ပြုခြင်းကို သဘာပတိ ခရစ်ယာန် ဆက်သွယ်ရေးဌာန တာဝန်ခံ ဆရာမ မေနှင်းဆီ၊ ဒေသနာကို မြန်မာနိုင်ငံ နှစ်ခြင်း ခရစ်ယာန် အသင်းတော်များ အဖွဲ့ချုပ် MBCU အထွေထွေ အတွင်းရေးမှူး Rev. စောထူးအယ်၊ အထူးဆုတောင်းခြင်း နှင့် ကောင်းချီးပေးခြင်းကို Rev. အိုက်နပ်တောင်းတို့က ဦးဆောင်ခဲ့ပါသည်။ ဆက်လက်ပြီး ကျန်ရှိသော လူမျိုးစုနှင့်ဒေသန္တရအဖွဲ့ချုပ်များနှင့် တိုက်ရိုက်ဆက်သွယ်သော အသင်းတော်(၂)ပါးမှ အစီရင်ခံစာများကို ဖတ်ကြားတင်ပြခဲ့ပါသည်။ ထို့နောက် အလုပ်အမှုဆောင်အဖွဲ့မှ တင်ပြသော ထောက်ခံတင်ပြချက် များကို ကြားနာလျက် သဘောတူဆုံးဖြတ်ခဲ့ကြပါသည်။

သဘောတူလက်ခံဆုံးဖြတ်ချက်များအရ လူငယ်ဌာနမှ သက်တမ်းပြည့်အနားယူမည့် တာဝန်ခံ ရာထူးနေရာ တွင်   ဆရာမဧပရယ်‌နွေး၊ လစ်လပ်လျက်ရှိသော ခရစ်ယာန် ဓမ္မပညာဌာန လက်ထောက်တာ၀န်ခံ နေရာတွင် ဆရာမနိန်လွန်းဒိမ်တို့ကို ခန့်အပ်ခဲ့ပါသည်။ အလုပ်အမှုဆောင်အဖွဲ့မှ ခန့်အပ်ထားသော ပုံနှိပ်တိုက် မန်နေဂျာရာထူး တွင် ဆရာစရှမွေလ၊ မေတ္တာတမန် အယ်ဒီတာနေရာတွင် ဆရာမနော်လိုစေး၊ ယုဒသန်တက္ကသိုလ် ဖြစ်မြောက်ရေး ကော်မတီ အတွင်းရေးမှူးအဖြစ် ဆရာမနော်လားဖောတို့ကိုလည်း မိတ်ဆက်ပေးပါသည်။ အမျိုးသားဌာန တာဝန်ခံ တတိယ သက်တမ်းအဖြစ် Rev. ဘရန်ဆိုင်း၊ ဒုတိယအကြိမ် သက်တမ်း အဖြစ် ခရစ်ယာန် ဆက်သွယ်ရေးဌာန တာဝန်ခံ ဆရာမ မေနှင်းဆီ နှင့် ခေါင်းဆောင်မြှင့်တင်ရေးအစီအစဥ်ဌာန တွဲဖက် တာဝန်ခံ ဆရာမ ရုသတို့ကိုလည်း ပြန်လည်ခန့်အပ် ခဲ့ပါသည်။

သက်တမ်းပြည့်အနားယူသွားသော လူငယ်ဌာနတာ၀န်ခံ ဆရာ၀င်းထွဋ်သာကြည်၊ ပုံနှိပ်တိုက် မန်နေဂျာ ဆရာစောတင်ထွန်းနှင့် မေတ္တာတမန် မဂ္ဂဇင်း အယ်ဒီတာ ဆရာမ မိုင်သင်းသင်းစိုး တို့ကိုလည်း  ဒုတိယ ဥက္ကဌ Rev. စောစမ်စန်က ဂုဏ်ပြုစကား ပြောကြားခြင်း၊ ဥက္ကဌကြီး Rev. Dr. စောဆမ်ဆန်၊ အထွေထွေ အတွင်းရေးမှူး Rev. Dr. ထန်ကျင့်လျန်း နှင့် ဘဏ္ဍာထိန်း ဆရာမနန်းသူဇာမွန်တို့က ဂုဏ်ပြု လက်ဆောင်ပေးခြင်းနှင့် ဒုတိယ ဥက္ကဌ Rev. Dr. အေးနွယ်က ဆက်ကပ်ဆုတောင်းပေးခြင်းတို့ဖြင့် ဂုဏ်ပြုခဲ့ပါသည်။

လူမျိုးစုနှင့် ဒေသန္တရအဖွဲ့ချုပ်များ၏ အစည်းအဝေးများသို့ အသင်းချုပ် ကိုယ်စားလှယ်များ စေလွှတ်ရန် ကိစ္စတွင် အဖွဲ့ချုပ်များမှ ဖိတ်ကြားသော ဆရာ၊ ဆရာမများကို စေလွှတ်ရန်လည်း ညှိနှိုင်း လုပ်ဆောင်ခဲ့ပါသည်။  နာဂနှစ်ခြင်း ခရစ်ယာန် အဖွဲ့ချုပ်၏ လဟယ်နယ်နှင့် ရှင်ဗွေယန်နယ်တို့ကို နယ်အသင်းတော်များအဖွဲ့သို့ အဆင့် တိုး မြှင့်ခြင်းကိုလည်း အားလုံးလက်ခံသဘောတူအတည်ပြုလျက်၊ ၂၀၂၅ ခုနှစ်တွင် ကျရောက်မည်ဖြစ်သော (၁၂၅) ကြိမ်‌ မြောက် သင်းလုံးကျွတ်အစည်းအဝေးသို့  ဆက်လက် ထောက်ခံ တင်ပြသွားရန် အားလုံး သဘောတူဆုံးဖြတ်ကြ ပါသည်။

နောက်တစ်ကြိမ် အစည်းအဝေးဖြစ်သော နှစ်ခြင်းအသင်းချုပ်၊ အုပ်ချုပ်စီမံရေး အဖွဲ့အစည်းအဝေး (၂၀၂၄ ခုနှစ်) နှင့် (၁၂၅)ကြိမ်‌မြောက် သင်းလုံးကျွတ် အစည်းအဝေးကို အိမ်ရှင်အဖြစ် ကရင်နှစ်ခြင်း ခရစ်ယာန်အဖွဲ့ချုပ်မှ တာဝန်ယူမည်ဖြစ်ပြီး၊ ရန်ကုန် အလုံ Franc Hall တွင် ပြုလုပ်မည် ဖြစ်ပါသည်။

“အမိမြန်မာပြည်ကြီး အမြန်ဆုံးငြိမ်းချမ်းပါစေ။”